Adega de recente creación, fundada en 2017 polo "Colleiteiro" Javier Estévez Abeledo. Atópase no Val do Avia, en Beade. Ten unha estrutura moderna e dispón de tódalas comodidades para traballar, etiquetar e vender o seu viño.
Javier cultiva as súas propias uvas, asegurando así que controla o proceso dende o principio. Non utiliza sulfatos sistémicos, herbicidas ou insecticidas. Consegue regular as cantidades de uva mediante tratamentos menos agresivos e respectando a súa máxima calidade. Todo isto dá lugar a uns viños diferentes, de fermentación espontánea e sempre de gran calidade.
Conta con varias parcelas, cunha superficie total de viñedos de 1,5 Ha, situadas arredor da adega. Xoga nas súas diferentes parcelas coas altitudes, aproveitando a mellor xeografía do terreo e as súas orientacións.
Cultiva tanto uvas brancas (Treixadura, Albariño, Godello, Lado e Torrontés), como tintas (Caíño Longo, Sousón, Brencellao e Ferrón).
Aínda que a súa adega é nova, Javier sempre estivo relacionado co mundo do viño, xa que os seus pais o facían na casa e vendían tamén uvas a outras adegas. El mesmo é o encargado de facer todos os traballos (coidar as vides, vendima, embotellado,...), aínda que nas horas puntas pídelle axuda á súa familia.
Realiza visitas á adega con cita previa.
Algúns dos seus últimos premios son:
• Medalla de Ouro no concurso “Challenge International Du Vin” 2021, con Cuvée UG 2019
• Mellor Viño Tinto Colleiteiro 2021 na X Gala dos Premios DO Ribeiro, con Tinalla 2020
• Mención Gallaecia 2021, con Cuvée UGH 2019
• Mención Gallaecia 2019, con Tinalla
• Gran Ouro na lista Paadin, da Guía de Viños Destilados de Galicia, con Mal Raio Te Parta.